གངས་དཀར་ཨ་མའི་སྡུག་གྲིབ་ནག་པོ་ཁེར་རྐྱང་མཆི་མའི་རྒྱུན་གྱིས་བཀྲུས།།

རྩམ་གཟན་མི་ཡི་ལོ་རྒྱུས་མོག་པོ་ཤེས་རབ་རྣོན་པོའི་རྩལ་གྱིས་དཀྲུགས།།

བླ་མཁར་ཞིག་པོའི་བཤུལ་རྗེས་མང་བོ་འགྲུལ་བཞུད་བཙན་པོའི་སྟོབས་ཀྱིས་བཙལ།།

མེས་པོའི་གཏམ་རྒྱུད་གླུ་རུ་ལེན་པའི་དཔའ་བོའི་ཉམས་རྟོགས་ཐོལ་གྱིས་སད།།

ཤ་ཁྲག་བཙག་པའི་ཉིང་ཁུ་དམར་བོས་རིགས་རྒྱུད་དྲན་པའི་རྟེན་ཞིག་བསླངས།།

རུས་ཐལ་གཏོར་སའི་གདམ་ག་ཟབ་མོས་ཁ་བའི་ཐལ་མཆོད་ཅིག་འཕངས།།

རྨི་ལམ་འཁྲིགས་པའི་བསམ་བློ་ལྕི་མོས་སྦྲ་གུར་སྡེ་ཡི་རྒྱན་ཞིག་བཏེགས།།

ལྷ་དང་ཀླུ་ཡི་རྒྱལ་ཁམས་ཤིག་ནས་རླུང་རྟ་ཅན་འདི་ལམ་ལ་ཆས།།

རྣམ་ཤེས་སྟོང་གི་ངུ་འབོད་འབྱིན་པའི་མེས་པོའི་དུར་ས་རྒྱང་ནས་རྙེད།།

རེ་སྒུག་ལྕི་མོའི་མ་ནི་བགྲང་སའི་ཨ་མའི་རི་སྒང་མདུན་ནས་མཐོང་།།

སྙིང་གཏམ་སྐྱུར་བོའི་མཆི་མ་འདོན་པའི་ཕུ་ནུའི་ན་ཚ་བར་ནས་མྱངས།།

གངས་ཀྱི་རི་བོའི་སུལ་བར་ཞིག་ནས་རིགས་ཀྱི་སྤོབས་པ་ཕྱོགས་སུ་བསྐྱེད།།

ཟླ་བ་མེད་པའི་དུས་ཚིགས་ཁྲོད་ནས་མུན་པའི་ཟིན་ཐོ་བོད་ལ་བཞེངས།།

ཁ་བ་འབབ་པའི་ལོ་ཟླ་ཞིག་ནས་རླུང་བུའི་གཏམ་རྒྱུད་གངས་ལ་བྲིས།།

མེ་ཏོག་ཤི་བའི་ནམ་ཚོད་ཅིག་ནས་སད་ཀྱི་བརྗེད་བྱང་སྤང་ལ་བཙུགས།།

ནག་ཉེས་ཅན་གྱི་ཞབས་རྗེས་འདི་ཡིས་ཐུ་བྷོད་གླིང་ལ་མཚར་སྡུག་བཞག།

བང་སོ་སྟོང་བའི་རླུང་འཚུབ་ཁྲོད་ན་ཁྱོད་ཀྱི་གྲིབ་གཟུགས་འདར་ཡོམ་ཡོམ།།

བདག་པོ་མེད་པའི་བྱིས་པའི་བར་ན་ཁྱོད་སེམས་ཀྱི་ཁམས་ལྗིད་ཏིག་ཏིག།

རྒྱལ་ཁབ་ཤོར་བའི་དབེན་ཐང་ཞིག་ན་ཁྱོད་ཀྱི་ལུས་པོ་གྲང་ཤུར་ཤུར།།

བསམ་གཞིགས་ལྕི་མོས་མགོ་བོ་མནན་པའི་སྙན་ངག་དབྱངས་རྟ་སྡུག་གིས་བཞུར།།

གངས་ཀྱི་ལོ་རྒྱུས་བདེན་པ་བརྡར་ནས་གངས་ལྷ་དགའ་བའི་ཞབས་བྲོ་འཁྲབ།།

ཨ་མའི་བུ་ཡི་ལས་དབང་དམར་བོ་གངས་དཀར་ལྷུན་པོའི་རྩ་ལ་མདུད།།

དེ་རིང་ས་སྲོད་ཐོལ་ཐོལ་འགུལ་དུས་མཚན་མོ་ནག་པོའི་གདུག་རྩུབ་བབས།།

ཉམས་མེད་གླུ་བའི་སྐད་ངག་འགགས་པའི་མྱ་ངན་རྒྱུ་བ་གང་སར་འཕྱུར།།

ལྷིང་འཇགས་ཁམས་ཀྱི་མཛེས་སྡུག་བོར་བའི་གསང་བའི་མདུད་པ་ཁད་ཀྱིས་དཀྲོལ།།

ཤུགས་རིང་སྟོང་གི་སྙན་ངག་འདི་ཡང་སེམས་པ་ན་བའི་མལ་ནས་ཤོར།།

                                                                                                            ༢༠༠༤-༡-༡༢